Тизимнинг ушбу имкониятидан фойдаланиш учун Сиз авторизация қилинишингиз керак!
Рўйхатдан ўтишни хоҳлайсизми? Ёки тизимга ўз логинингиз билан кирасизми?
Авторизация қилиш
Рўйхатдан ўтиш
Ру
Ўз
O‘z|Ру
Асосий реквизитлар
Кодификация
Қайта кўриб чиқилган ҳужжатлар
Ҳужжатни қайта кўриб чиқишга асос бўлган ҳужжатлар
Корреспондентлар
Респондентлар
Ҳаммаси
Кейинги таҳрирга ҳавола
Олдинги таҳрирга ҳавола
АПК бўйича индекслаш
ҚСУК бўйича индекслаш
ТТР бўйича индекслаш
ҚМҚ бўйича индекслаш
Ўзгартиришлар манбаси
Расмий нашр манбаси
Шарҳ
05.09.2018
[
OKOZ:
1.
19.00.00.00 Xalqaro munosabatlar. Xalqaro huquq / 19.06.00.00 Xalqaro shartnomalar huquqi / 19.06.01.00 Umumiy masalalar]
[
TSZ:
1.
Tashqi siyosat va xalqaro munosabatlar / Umumiy masalalar]
O‘zbekiston Respublikasi Prezidenti Shavkat Mirziyoyev va Misr Arab Respublikasi Prezidenti Abdulfattoh as-Sisining Qo‘shma bayonoti
Toshkent, 5-sentabr 2018-yil
(O‘zbekiston Respublikasi uchun 2018-yil 5-sentabrdan kuchga kirgan)
O‘zbekiston Respublikasi Prezidenti Shavkat Mirziyoyevning taklifiga binoan 2018-yil 5-sentabrda Misr Arab Respublikasi Prezidenti Abdulfattoh as-Sisi rasmiy tashrif bilan O‘zbekistonda bo‘ldi.
1. Davlat rahbarlari o‘zaro do‘stona muhitda bo‘lib o‘tgan samarali muzokaralar va uchrashuvlar davomida ikki tomonlama keng ko‘lamli hamkorlikning barcha jabhalarini muhokama qildilar va dolzarb xalqaro muammolar bo‘yicha fikr almashdilar.
Tomonlar ko‘rib chiqilgan barcha masalalar yuzasidan qarashlari yaqin va o‘xshash ekanligini mamnuniyat bilan ta’kidladilar.
Prezidentlar muqaddam erishilgan kelishuvlar va imzolangan ikki tomonlama hujjatlarning amalga oshirilish jarayonini muhokama qildilar, siyosiy, savdo-iqtisodiy, investitsiyaviy, innovatsion va ilmiy-texnikaviy, turizm va madaniyat sohalarida o‘zaro manfaatli ikki tomonlama hamkorlikni yanada faollashtirish muhimligini qayd etdilar.
2. Tomonlar keng ko‘lamli o‘zaro manfaatli hamkorlik va ikki tomonlama shartnomaviy-huquqiy bazani yanada rivojlantirish va mustahkamlashga intilishlaridan kelib chiqib, turli darajalarda siyosiy maslahatlashuvlar o‘tkazish va sheriklik aloqalarini mustahkamlashga tayyor ekanliklarini bildirdilar.
3. Misr Arab Respublikasi Prezidenti Abdulfattoh as-Sisi hozirgi kunda hayotga faol tatbiq etilayotgan 2017 — 2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha
Harakatlar Strategiyasiga
, Prezident Shavkat Mirziyoyev rahbarligida O‘zbekistonda davlat va jamiyat qurilishi hamda iqtisodiyotni liberallashtirishning barcha yo‘nalishlarida amalga oshirilayotgan demokratik islohotlarga yuqori baho berdi.
O‘z navbatida, O‘zbekiston Respublikasi Prezidenti Misr Arab Respublikasi Prezidentining siyosiy barqarorlik, iqtisodiy islohotlar, terrorizm va ekstremizmga qarshi kurashdagi yutuqlari hamda yoshlar bilan mamlakat kelajagi rivojiga qaratilgan muloqot yo‘lidagi sa’y-harakatlarini yuqori baholadi.
Shu bilan birga, Misrda muvaffaqiyat bilan olib borilayotgan bunyodkorlik ishlari va yirik loyihalarning amalga oshirilishi mamnuniyat bilan qayd etildi.
4. Prezidentlar mintaqaviy va global hamkorlarning qat’iy qo‘llab-quvvatlashi bilan Afg‘oniston Islom Respublikasida afg‘on xalqi boshchiligida keng qamrovli tinchlik jarayonini tez fursatda amalga oshirish muhimligini ta’kidladilar.
Prezidentlar Afg‘onistonni barqarorlashtirish va qayta tiklash bo‘yicha o‘z sa’y-harakatlari va o‘xshash yondashuvlarini mamnuniyat bilan qayd etib, birgalikda harakat qilish hamda Afg‘oniston masalalari bo‘yicha ko‘p tomonlama forumlar doirasida hamkorlikni kengaytirishga chaqirdilar.
Shu munosabat bilan, Rahbarlar 2018-yil 26-27-mart kunlari O‘zbekistonda o‘tkazilgan “Tinchlik jarayoni, xavfsizlik sohasida hamkorlik va mintaqaviy sheriklik” mavzusidagi Afg‘oniston bo‘yicha konferensiyada qabul qilingan Toshkent deklaratsiyasini amalga oshirish bo‘yicha hamkorlikka tayyor ekanliklarini ta’kidladilar.
5. Davlat rahbarlari turli nizolar va qarama-qarshiliklarni siyosiy muzokaralar, tinchlik tashabbuslari va vositachilik sa’y-harakatlari orqali xalqaro huquq va BMT Nizomi doirasida hal qilish tarafdori ekanliklarini yana bir bor ta’kidladilar.
6. Prezidentlar xalqaro terrorizm, diniy ekstremizm, noqonuniy migratsiya, giyohvandlik vositalarining noqonuniy muomalasi, transmilliy uyushgan jinoyatchilik va boshqa mintaqaviy tahdidlarning kuchayib borayotganidan tashvishda ekanliklarini bildirdilar.
7. Tomonlar savdo-iqtisodiy, investitsiyaviy, innovatsion, ilmiy-texnikaviy, turizm va madaniyat sohalarida ikki tomonlama hamkorlikni rivojlantirish, shuningdek, qishloq xo‘jaligi sohasida ilg‘or tajriba va ilmiy izlanish natijalari bilan o‘zaro almashish orqali hamkorlik qilish muhimligini ta’kidladilar.
Shu munosabat bilan, Prezidentlar Iqtisodiy va ilmiy- texnikaviy hamkorlik bo‘yicha O‘zbekiston-Misr hukumatlararo qo‘shma komissiyasining yig‘ilishlarini va ikki tomonlama biznes-forumlarni muntazam va muvaffaqiyatli o‘tkazishni ko‘llab-quvvatlashlarini bildirdilar.
8. Prezidentlar ikki mamlakat o‘rtasida savdo-iqtisodiy aloqalarni rivojlantirish va tovar ayirboshlash hajmining o‘sishini ta’minlashga qaratilgan sa’y-harakatlarni davom ettirish zarurligini ta’kidlab o‘tdilar. Savdo hajmini yaqin yillarda kamida o‘n barobarga oshirish uchun tomonlarda barcha imkoniyat va zaxiralar mavjudligini qayd etdilar.
O‘zbekiston tomoni Misr bozorida yuqori talabga ega bo‘lgan elektrotexnika, mashinasozlik, metallurgiya, kimyo va neft-kimyo, yengil sanoat, oziq-ovqat, qishloq xo‘jaligi va boshqa mahsulotlarni eksport qilishga tayyorligini bildirdi.
Shuningdek, Misr tomoni O‘zbekiston bozoriga dori-darmon, tibbiyot jihozlari, gilamlar, mebellar, pardalar, neft-kimyo mahsulotlari, raqamli xizmatlar, marmar, keramika, teri va plastik mahsulotlarini eksport qilishga tayyor ekanligini bildirdi.
Shu bilan birgalikda, ikki tomonlama savdo aylanmasiga qulay shart-sharoitlar yaratish, tovar ayirboshlash tuzilmasini to‘liq diversifikatsiya qilish va uning hajmini kengaytirish masalalarini muhokama qilish maqsadida ikki davlat mas’ul idoralari o‘rtasida muzokaralar o‘tkazishga kelishib olindi.
9. Prezidentlar ikki mamlakat ishbilarmon doiralari vakillarining delegatsiyalar almashinuvini faollashtirish, O‘zbekiston va Misrda o‘tkaziladigan ko‘rgazma-yarmarkalarda ishtirok etish, ikki davlat mintaqalari o‘rtasida o‘zaro hamkorlik bitimlarini tuzishni rag‘batlantirishga chaqirdilar.
Tomonlar qishloq xo‘jaligi sohasida ilmiy izlanishlar natijalari va ilg‘or tajriba bilan almashish borasida ishonchli hamkorlik aloqalarini o‘rnatishga kelishib oldilar.
10. Prezidentlar tashqi bozorlarga tez va samarali chiqishni ta’minlovchi transport va tranzit yo‘laklarini rivojlantirish sohasida hamkorlikni chuqurlashtirish mamlakatlar o‘rtasida
Xalqaro savdo hajmini kengaytirishda muhim ahamiyat kasb etishini ta’kidladilar.
Shu o‘rinda, Tomonlar Xalqaro suv yo‘lagi sifatida Suvaysh kanali ahamiyatini ta’kidladilar. Suvaysh kanalidagi iqtisodiy zona O‘zbekiston mahsulotlarini ishlab chiqarish va uni jahon bozoriga chiqishini yengillashtirish uchun qulay muhit yaratadi.
Shu maqsadda, Tomonlar aviakompaniyalarining mintaqalararo hamkorlik, erkin tadbirkorlik, turizm va madaniy aloqalarning rivojlanishiga kulay shart-sharoit yaratishiga asos bo‘ladigan ikki mamlakat o‘rtasida havo qatnovlarini yo‘lga qo‘yishga qaratilgan sa’y-harakatlarini olkishladilar.
11. Davlat rahbarlari O‘zbekiston Respublikasi Jismoniy tarbiya va sport ishlari vazirligi, O‘zbekiston Yoshlar ittifoqi bilan Misr Yoshlar va sport ishlari vazirligi o‘rtasida hamkorlik o‘rnatishni va mazkur sohada ikki davlat o‘rtasida aloqalarni rivojlantirishni qo‘llab-quvvatlash muhim ahamiyatga ega ekanligini ta’kidladilar.
12. Tomonlar O‘zbekiston va Misr xalqlari o‘rtasidagi tarixiy, madaniy va ma’naviy umumiylikni hisobga olib, gumanitar sohada, islom madaniy va ilmiy merosini o‘rganish va muhofaza qilish bo‘yicha hamkorlikni rivojlantirish muhim ekanligini ta’kidladilar. O‘zbekiston va Misrning ulkan tarixiy-madaniy va ma’naviy merosi, ularning musulmon dunyosidagi o‘rni, islom sivilizatsiyasi rivojiga qo‘shgan hissasini inobatga olib, Tomonlar bag‘rikeng islomni targ‘ib qilishda hamkorlikni davom ettirish zarur deb hisoblaydilar va “Al-Azhar” majmuasining ma’rifatparvar islom g‘oyalarini qo‘llab-quvvatlash va mustahkamlashdagi o‘rnini e’tirof etadilar.
13. Prezidentlar mintaqaviy va global darajada xavfsizlik, tinchlik va barqarorlikni mustahkamlashga intilishlarini yana bir bor ta’kidladilar hamda Birlashgan Millatlar Tashkiloti, Islom hamkorlik tashkiloti hamda boshqa xalqaro va mintaqaviy tuzilmalar doirasida hamkorlikni yanada kengaytirishga qat’iy tayyor ekanliklarini tasdiqladilar.
Misr tomoni O‘zbekiston tomonining BMT Bosh Assambleyasining “Markaziy Osiyo mintaqasida tinchlik, barqarorlik va izchil taraqqiyotni ta’minlash bo‘yicha mintaqaviy va xalqaro hamkorlikni mustahkamlash” va “Ma’rifat va diniy bag‘rikenglik” rezolyutsiyalarini tayyorlash va qabul qilish, BMTning Yoshlar huquqlari to‘g‘risidagi Konvensiyasini ishlab chiqish, shuningdek, Islom hamkorlik tashkilotining Fan va texnologiyalar bo‘yicha ikkinchi sammitini 2020-yilda O‘zbekistonda o‘tkazish bo‘yicha tashabbuslarini qullab-quvvatladi.
O‘zbekiston tomoni Qohira shahrida Islom hamkorlik tashkiloti huzurida Xotin-qizlar faoliyatini rivojlantirish tashkilotini tashkil etish bo‘yicha Misr Arab Respublikasining tashabbusini qo‘llab-quvvatladi.
14. Misr Arab Respublikasi Prezidenti Abdulfattoh as-Sisi O‘zbekiston Respublikasi Prezidenti Shavkat Mirziyoyevga Misr delegatsiyasi a’zolariga ko‘rsatilgan mehmondo‘stlik va iliq qabul uchun samimiy minnatdorlik bildirib, O‘zbekiston Respublikasi Prezidentini o‘zi uchun qulay bo‘lgan vaqtda Misr Arab Respublikasida rasmiy tashrif bilan bo‘lishga taklif qildi. Tashrif muddatlari diplomatik kanallar orqali kelishiladi.
(imzolar)
×
×