[
ОКОЗ:
1.
09.00.00.00 Тадбиркорлик ва хўжалик фаолияти / 09.21.00.00 Сув хўжалиги;
2.
19.00.00.00 Халқаро муносабатлар. Халқаро ҳуқуқ / 19.06.00.00 Халқаро шартномалар ҳуқуқи / 19.06.02.00 Шартномаларни тузиш ва уларнинг кучга кириши]
[
ТСЗ:
1.
Ташқи сиёсат ва халқаро муносабатлар / Халқаро шартномалар (битмлар)]
Ўзбекистон Республикаси Ҳукумати номидан Ўзбекистон Республикаси Сув хўжалиги вазирлиги билан Швейцария Ҳукумати номидан Швейцария тараққиёт ва ҳамкорлик агентлиги ўртасида
Битим
«Ўзбекистонда сув ресурсларини бошқариш миллий Лойиҳаси, II босқич» тўғрисида
Тошкент, 2020 йил 16 июнь
LexUZ шарҳи
Мазкур Битим Томонлар ўртасида 2020 йил 16 июнь куни имзоланган.
(Ўзбекистон Республикаси учун 2020 йил 16 июндан кучга кирган)
Ўзбекистон Республикаси ва Швейцария Конфедерацияси ўртасидаги мавжуд дўстона муносабатларни мустаҳкамлашга интилган ҳолда ҳамда хусусан, ҳар икки Томоннинг ички ва ташқи сиёсатини рағбатлантирадиган ва мазкур Битим мақсадлари билан бир қаторда муҳим унсур ҳисобланадиган Инсон ҳуқуқлари умумжаҳон Декларациясида баён этилган демократия принциплари ва фундаментал инсон ҳуқуқларини ҳурмат қилган ҳолда,
2002 йил 20 сентябрь куни имзоланган Ўзбекистон Республикаси Ҳукумати билан Швейцария Федерал Кенгаши ўртасида Техникавий ва молиявий ҳамкорлик ҳамда инсонпарварлик ёрдами тўғрисидаги Битимга (кейинги ўринларда — «2002 йилдаги Битим») мувофиқ ва уни амалда қўллаган ҳолда, Ўзбекистон Республикаси Ҳукумати номидан Сув хўжалиги вазирлиги ва Швейцария Ҳукумати номидан Швейцария тараққиёт ва ҳамкорлик агентлиги қуйидагилар тўғрисида келишиб олдилар:
I модда. Умумий шартлар ва тушунчалар
Мазкур Битимда қўлланилган тегишли атамалар, башарти матнда бошқача талаб этилмаса, қуйидаги маъноларга эга:
a) «Томонлар» Ўзбекистон Республикаси Ҳукумати ва Швейцария Ҳукуматини англатади;
b) «Лойиҳа» Швейцария Ҳукумати томонидан молиялаштириладиган, Швейцария тараққиёт ва ҳамкорлик агентлиги томонидан тайёрланган ва ушбу Битимнинг ажралмас қисми ҳисобланган Лойиҳа ҳужжатида белгиланган «Ўзбекистонда сув ресурсларини бошқариш миллий Лойиҳаси»ни англатади;
c) «ШТҲА» Швейцария тараққиёт ва ҳамкорлик агентлигини англатади;
d) «Швейцария элчихонаси» Швейцариянинг Ўзбекистондаги элчихонасини англатади;
e) «СХВ» Ўзбекистон Республикаси Сув хўжалиги вазирлигини англатади;
f) «ЛБҚ» Лойиҳанинг умумий назорати ва мувофиқлаштирилишини таъминлаш, шунингдек, стратегик масалаларни ҳал этиш учун ташкил этилган Лойиҳани бошқариш қўмитасини англатади;
g) «GEF агентлиги» Орол денгизи ҳавзаси ва GEF лойиҳаларини амалга ошириш бўйича Оролни қутқариш халқаро жамғармасининг агентлигини англатади;
h) «Ижроия агентлиги» Лойиҳани амалга ошириш учун ШТҲА томонидан тайинланган GEF агентлиги ҳамда Жамоанинг халқаро раҳбарини англатади;
i) «СРИБ» Сув ресурсларини интеграциялашган бошқаришни англатади.
II модда. Лойиҳанинг мақсадлари
1. Лойиҳа иккинчи босқичининг умумий мақсади Ўзбекистонда сув ресурсларини интеграциялашган бошқариш орқали қишлоқ жойларидаги аҳолининг турмуш даражасини оширишдан иборат.
2. Лойиҳадан кутилаётган асосий якуний натижалар:
1-якуний натижа: Сув хўжалиги вазирлиги СРИБ принципларига асосланган кенг қамровли стратегик ва тартибга солиш базасини жорий қилади.
2-якуний натижа: Фермерлар ва сув хўжалиги ташкилотлари сув ресурсларидан самарали ва оқилона фойдаланадилар.
III модда. Битимнинг амал қилиш доираси
1. Мазкур Битим унга илова қилинган ва унинг ажралмас қисми ҳисобланадиган Лойиҳа ҳужжатида белгиланган, Ўзбекистон Республикасида амалга ошириладиган фаолиятларни ўз ичига олади.
2. Швейцария элчихонаси ШТҲА номидан Лойиҳани амалга оширишда СХВ билан яқиндан ҳамкорлик қилади. Бошқа манфаатдор вазирликлар ва идоралар билан ўзаро алоқа СХВ орқали амалга оширилади.
IV модда. Амалга ошириш бўйича мажбуриятлар
1. СХВ Ўзбекистон Республикаси Ҳукумати номидан мазкур Битим ва Лойиҳани амалга ошириш учун масъул ҳисобланади.
2. ШТҲА Швейцария Ҳукумати номидан мазкур Битимни қўллаш ва Лойиҳани амалга ошириш учун Ижро органи ҳисобланади. Швейцария элчихонаси ШТҲАнинг Ўзбекистондаги вакили ҳисобланади ҳамда Лойиҳани амалга ошириш ва мувофиқлаштириш учун масъулдир.
3. Томонларнинг умумий қарорига асосан, ШТҲА Лойиҳа ҳужжатида белгилангани бўйича, Лойиҳани амалга оширишни Ижроия агентлиги (GEF агентлиги ва Жамоанинг халқаро раҳбари) зиммасига юклайди.
V модда. Иммунитет ва имтиёзлар
Ўзбекистон Республикаси Ҳукумати:
a) 2002 йилдаги Битимнинг 6-моддаси 6.2 ва 6.8-бандларида назарда тутилган ҳамда 1961 йил 18 апрелдаги Дипломатик алоқалар тўғрисидаги Вена
конвенциясига
мувофиқ одатда дипломатик миссияларга тақдим қилинадиган айни иммунитет ва имтиёзлар билан Швейцария элчихонасини ва унинг ходимларини таъминлайди;
b) Швейцария элчихонасининг мурожаати асосида Лойиҳада иштирок этадиган мутахассисларга 2002 йилдаги Битимнинг 6-моддаси 6.4-бандига кўра консуллик ва бошқа тўловларсиз, вақтинча кириш ва чиқиш визаларини беради;
c) Лойиҳа доирасида олиб кириладиган товарларни божхона божларидан озод этади. Лойиҳа доирасида Ўзбекистон ҳудудида сотиб олинадиган товарлар, ишлар ва хизматлар қўшилган қиймат солиғидан ва давлат мақсадли жамғармаларига мажбурий ажратмаларидан озод этилади;
d) валюта ўтказмаларини тартибга солишнинг амалдаги қоидаларига мувофиқ Лойиҳанинг эҳтиёжлари ёки унинг мутахассислари билан боғлиқ бўлган чет эл валютасидаги халқаро пул ўтказмаларини амалга ошириш учун қулай шарт-шароитлар яратилишига кўмаклашади;
e) хорижий ва маҳаллий мутахассисларга ўз хизмат вазифаларини бажаришда ёрдам беради, шунингдек, уларга Ўзбекистон Республикаси қонунчилигига мувофиқ Лойиҳани муваффақиятли амалга ошириш учун зарур бўлган рухсатномалар, ҳужжатлар ва маълумотларни тақдим этади.
VI модда. Швейцария Ҳукуматининг мажбуриятлари
1. ШТҲА Лойиҳани 4,6 миллион (тўрт миллион олти юз минг) АҚШ долларигача миқдорда бўлган ҳисса орқали молиялаштиради.
2. Лойиҳа маблағлари ШТҲА томонидан Швейцария элчихонаси орқали бошқарилади.
VII модда. Ўзбекистон Республикаси Ҳукуматининг мажбуриятлари
1. СХВ Лойиҳа мақсадларининг тўлиқ уйғунлигини ва амалга оширилишини кафолатлаш учун Лойиҳани лозим даражада мувофиқлаштириш ва қўллаб-қувватлашни таъминлайди, шунингдек, Лойиҳа доирасида ташкил этиладиган тегишли тадбирларда Ўзбекистон Республикаси Ҳукумати вакилларининг иштирокига кўмаклашади.
2. СХВ Швейцария элчихонаси ва GEF агентлигини ёзма сўровига асосан Лойиҳанинг муваффақиятли амалга оширилиши учун уларнинг ўз вазифаларини энг самарали ва лозим даражада бажаришларига имкон бериш мақсадида зарур бўлган маълумот ва рухсатномалар билан зудлик билан таъминлаш мажбуриятини олади. Бундай маълумотлардан фақат Лойиҳа мақсадлари учун фойдаланилади. Ҳар қандай бошқа мақсадларда фойдаланиш СХВ билан олдиндан ёзма равишда келишилади.
3. Тўлиқ уйғунликни кафолатлаш мақсадида СХВ Швейцария Ҳукумати ва бошқа донорлар томонидан молиялаштириладиган тадбирларни лозим даражада мувофиқлаштиришни таъминлайди. СХВ томонидан барча иштирокчилар ўртасида мунтазам маслаҳатлашувлар ташкил этилади.
4. СХВ Лойиҳа доирасида Швейцария Ҳукумати маблағлари ҳисобидан молиялаштириладиган товарлар ва ускуналарни хавфсиз жойда сақлаш ва уларга техник хизмат кўрсатиш бўйича қўшма чора-тадбирларни амалга оширади, шунингдек, Лойиҳа якунида Ўзбекистон Республикаси қонунчилигига мувофиқ ушбу товарлар ва ускуналарни топшириш бўйича тегишли жараёнларнинг амалга оширилишини таъминлайди.
VIII модда. Лойиҳани амалга ошириш механизмлари
1. Лойиҳа СХВ ва ШТҲА ўртасидаги қўшма ташаббус ҳисобланади.
2. Ўзбекистон томонидан СХВ:
а) келишилган Лойиҳа тадбирларини амалга оширишга кўмаклашиш учун барча зарур чора-тадбирларни кўради;
b) Лойиҳани бошқариш қўмитасида иштирок этади;
c) Лойиҳа тадбирларини унга жалб қилинган вазирлик ва идоралар ҳамда Ўзбекистон Республикасининг бошқа миллий ташкилотлари билан мувофиқлаштиради.
3. Швейцария томонидан Швейцария элчихонаси:
a) Лойиҳанинг умумий амалга оширилиши устидан мониторинг юритади;
b) Лойиҳани амалга оширишни қўллаб-қувватлаш учун узоқ ва қисқа муддатга ёлланган халқаро ва маҳаллий мутахассисларни тайинлаши мумкин;
c) Лойиҳанинг махсус қисмларини амалга ошириш учун бошқа шахсларни ва маҳаллий ёки халқаро ташкилотларни тайинлаши мумкин.
IX модда. Назорат қилиш ва мувофиқлаштириш
1. ЛБҚ йиғилиши бир йилда икки марта ўтказилади. ЛБҚ Томонлар вакиллари иштирок этган кворумга эга бўлади ва қарорлар консенсус асосида қабул қилинади.
2. ЛБҚ қуйидаги аъзолардан ташкил топади:
a) СХВ вакили;
b) Швейцариянинг Ўзбекистондаги элчихонаси раҳбари.
ЛБҚда қуйидагилар (овоз бериш ҳуқуқисиз) кузатувчи мақомига эга бўлади:
c) Ўзбекистон Республикаси Молия вазирлиги, Инвестициялар ва ташқи савдо вазирлиги, Қишлоқ хўжалиги вазирлиги, Иқтисодий тараққиёт ва камбағаликни қисқартириш вазирлиги ҳамда Олий ва ўрта махсус таълим вазирлигининг вакиллари;
d) муҳокама мавзусига кўра, Лойиҳага жалб қилинган бошқа идора ва ташкилотларнинг вакиллари;
e) Лойиҳага жалб қилинган бошқа донорларнинг вакиллари.
GEF агентлиги ЛБҚ котибияти вазифасини бажаради ва йиғилишларнинг кун тартибини тайёрлаш, таклифномалар юбориш, шунингдек, унинг аъзолари томонидан тасдиқланадиган баённомаларни юритишга масъулдир.
3. ЛБҚ қуйидаги вазифаларни амалга оширади:
a) Лойиҳани бошқариш билан боғлиқ стратегик масалаларни муҳокама қилиш ва қарорлар қабул қилиш;
b) Лойиҳа бўйича эришилган натижаларни мунтазам равишда кўриб чиқиш ва Лойиҳани амалга ошириш ҳолати бўйича йиллик ҳисоботлар ва молиявий ҳисоботларни тасдиқлаш, ушбу ҳисоботлар СХВ ва ШТҲА га уларнинг асосли қарор қабул қилишларига имкон бериш учун олдиндан топширилади;
c) Лойиҳанинг йиллик иш режаси ва бюджетини тасдиқлаш;
d) Лойиҳани қўллаб-қувватлаш ва уни амалга оширишдаги муҳим муаммолар бўйича қарорлар қабул қилишда йўриқномалар билан таъминлаш;
e) Лойиҳани амалга оширишда юзага келиши мумкин бўлган келишмовчиликларни тартибга солиш;
f) сув сиёсати ёки бошқа тегишли масалаларни муҳокама қилиш ва маълумот алмашиш;
g) Лойиҳанинг самарали бошқарилишини таъминлаш.
4. Йиғилишлар Томонлар билан маслаҳатлашувдан сўнг Котибият томонидан чақирилади. Навбатдан ташқари йиғилишлар ЛБҚ аъзоларидан бирининг сўровига мувофиқ чақирилиши мумкин.
X модда. Ҳисобот топшириш ва ахборот
1. Лойиҳани амалга ошириш ҳолати бўйича ҳисоботлар ва Лойиҳа доирасида молиялаштирилаётган фаолият билан боғлиқ барча харажатларни тасдиқловчи молиявий ҳисоботлар GEF агентлиги томонидан тайёрланади ҳамда Швейцария элчихонаси билан GEF агентлиги ўртасида тузилган контрактга мувофиқ ҳар олти ойда СХВ ва Швейцария элчихонасига тақдим этилади.
GEF агентлигининг бухгалтерия ҳисоботи ва молиявий ҳисоботи, шунингдек, ички назорат тизими мустақил аудиторлик фирмаси томонидан бир йилда бир марта текширилади.
2. Томонлар Лойиҳанинг амалга оширилишига таъсир қилиши мумкин бўлган ҳар қандай юзага келадиган вазият тўғрисида дарҳол бир-бирларини ёзма равишда хабардор қиладилар.
XI модда. Лойиҳани мониторинг қилиш ва баҳолаш
1. Лойиҳа фаолиятининг ички мониторинги GEF агентлиги томонидан амалга оширилади.
2. Ўзбекистон томонидан СХВ ва Швейцария томонидан Швейцария элчихонаси Лойиҳа тадбирларини мониторинг қилади. Бу концепциялар ва лойиҳалаштириш тафсилотларини муҳокама қилиш, камчиликлар ва уларни бартараф этиш воситаларини таҳлил қилиш, шунингдек, зарур ҳолларда, иш режаси ва жадвалларга ўзгартириш киритиш бўйича техник учрашувларни ўз ичига олади.
3. Швейцария элчихонаси ва Лойиҳа мутахассислари Лойиҳа ҳудудига мустақил равишда ёки Ўзбекистон Республикасининг тегишли вазирлик ва идоралари вакиллари билан биргаликда ташриф буюришлари мумкин.
4. СХВ, Ўзбекистон Республикаси Ҳукумати билан келишган ҳолда, ШТҲА томонидан Лойиҳанинг самарали амалга оширилишини таъминлаш мақсадида ўз ҳисобидан мустақил текширув миссияларини амалга ошириш ҳамда якуний баҳолаш ва даврий назорат миссияларини ташкил этиш мумкинлигига розилик билдиради.
5. Лойиҳа натижаларини баҳолаш 2023 йилда ўтказилади. Баҳолаш давомида эришилган натижалар ва Лойиҳанинг муваффаққиятли амалга оширилиши учун мақбул бўлган ёки бунга тўсқинлик қилувчи омилларга эътибор қаратилади. Баҳолаш ШТҲА томонидан тайинланадиган мустақил учинчи томон тарафидан амалга оширилади. Баҳолаш гуруҳига тегишли маълумотлардан тўлиқ фойдаланиш имконияти берилади. Баҳолаш ҳисоботи Томонларга тақдим этилади.
6. Лойиҳани амалга ошириш кўрсаткичлари ва қўшма ташқи баҳолаш натижаларига кўра икки Томон 2023 йилдан кейинги ҳамкорликни давом эттириш ва уни қандай шаклда амалга ошириш бўйича қарор қабул қилади.
XII модда. Товарлар ва хизматларни ҳарид қилиш
1. Швейцария Ҳукумати томонидан молиялаштириладиган товарлар ва хизматлар Швейцария тартиб-қоидаларига мувофиқ харид қилинади.
2. Лойиҳани амалга ошириш даврида ШТҲА маблағлари ҳисобидан Лойиҳа доирасида фойдаланиш учун тақдим этилган товарлар ШТҲАнинг чекланмаган тасарруфида бўлади ва Швейцария элчихонасининг олдиндан ёзма рухсатисиз Лойиҳадан ташқарида фойдаланилмайди. Бу ушбу Лойиҳанинг биринчи босқичида сотиб олинган товарларни ҳам ўз ичига олади.
3. Башарти маълум сабабга кўра Лойиҳани амалга ошириш тўхтатиладиган бўлса, ШТҲА маблағлари ҳисобидан тақдим этилган товарлардан фойдаланиш тартиби Томонлар ўртасида ёзма равишда белгиланади. Бундай ҳолда, ШТҲА ушбу товарлар билан боғлиқ ҳар қандай ҳолат учун жавобгар бўлмайди.
4. Лойиҳа якунида Томонлар Лойиҳа маблағлари ҳисобидан сотиб олинган товарларга мулкий эгалик қилиш ва улардан фойдаланиш бўйича ёзма равишда келишиб оладилар.
XIII модда. Битимнинг тугатилиши
1. Томонлардан ҳар бири ушбу Битимни тугатиш бўйича ёзма хабарномани уч ой олдин юбориш орқали уни тугатиш ҳуқуқига эга.
2. Томонлардан бири мазкур Битим мақсадларига ортиқ эришиб бўлмайди ёки иккинчи Томон ўз мажбуриятларини бажаришга қодир эмас деб ҳисоблаган тақдирда, бошқа Томон бир ой олдин ёзма хабарнома юбориш орқали уни тўхтатиб қўйиш ёки тугатиш ҳуқуқига эга бўлади. Юқорида келтирилган ҳолатларга қарамасдан, Томонлардан ҳар бири ушбу Битим шартлари қўпол равишда бузилган тақдирда, уни зудлик билан тугатиши мумкин. Қўпол равишда бузиш ушбу Битимнинг асосий мақсадларидан бирини жиддий равишда бузишни англатади.
3. Форс-мажор (табиий офат ва бошқалар) натижасида юзага келадиган ҳодисалар мазкур Битимни ижро этишга тўсқинлик қилса, Томонлардан бири уни амалга ошириш имконсиз бўлиб қолган вақтдан бошлаб Битимни тугатиши мумкин.
4. Мазкур Битим муддатидан олдин тугатилган ёки Лойиҳа якун топган тақдирда, Лойиҳа доирасида тақдим этилган сарфланмаган ҳар қандай маблағлар ШТҲАга қайтарилади.
XIV модда. Ўзгартиришлар киритиш ва низоларни ҳал қилиш
1. Мазкур Битимга ҳар қандай ўзгартириш ёки қўшимчалар киритиш Томонларнинг розилиги билан ёзма равишда амалга оширилади.
2. Мазкур Битим қоидаларини талқин қилиш ёки қўллашдан келиб чиқадиган ҳар қандай низолар Томонлар ўртасида дипломатик музокаралар ва маслатҳалашувлар орқали дўстона ҳал қилинади.
XV модда. Коррупцияга қарши курашиш қоидалари
Мазкур Битим доирасида Томонлар бевосита ёки билвосита бирон-бир хусусиятдаги фойдани таклиф қилмайдилар. Улар бундай таклифларни қабул қилмайдилар. Ҳар қандай коррупцион ёки ноқонуний хатти-ҳаракатлар ушбу Битимнинг қўпол бузилишини англатади ва унинг тугатилишига ва (ёки) амалдаги қонунчиликка мувофиқ қўшимча тузатиш чоралари қўлланилишига асос бўлади.
XVI модда. Иловалар
Лойиҳа ҳужжати иловалари билан бирга мазкур Битимнинг ажралмас қисми ҳисобланади ва фақат инглиз тилида келтирилади.
XVII модда. Амал қилиш муддати ва кучга кириши
Мазкур Битим 2020 йил 1 январдан 2023 йил 31 декабргача бўлган даврни қамраб олади. У Томонлар имзолаган вақтдан бошлаб кучга киради ва Томонлар ўзларининг барча шартномавий мажбуриятларини бажаргунларига қадар амал қилади.
Тошкент шаҳрида 2020 йил «16» июнда ҳар бир Томон учун бир нусхадан, тенг аутентик бўлган ўзбек ва инглиз тилларида икки асл нусхада имзоланди.
Мазкур Битим қоидаларини талқин қилишда тафовутлар вужудга келганда, инглиз тилидаги матн устувор ҳисобланади.
(имзолар)